DOE molusad og pakisusi sa explosion

Mohimo og kaugalingong imbestigasyon ang buhatan sa Department of Energy (DOE-7) sa nahitabong kalit nga pag-ulbo sa LPG sa usa ka laundry shop sa dakbayan sa Mandaue.

Si DOE 7 Director Antonio Labios nga gikahinabi sa Banat News miingon nga ilang kuhaon ang tanang detalye sa panghitabo sa gihimong pakisusi sa mga imbestigador sa kapolisan nga maoy ilang basehan sa pagpahamtang og silot sa mga establisamento nga nakaingon sa insidente.

Si Labios miingon nga kanunay nga gihimo ang inspeksiyon sa ilang buhatan sa mga gibaligya nga mga dealer sa LPG apan dili lang kapugngan nga may mahitabong aksidente.

Dugang pa niya nga ang LPG sa dili pa ibaligya ngadto sa mga konsumidor ang nagkinahanglan unta nga mopasar sa standard nga kalidad nga maoy gimbut-an sa DOE.

Gipasabot ni Labios nga usahay adunay sipyat sa paggamit na niini nga dili na masubay ang kaseguroan nga dili kini mohungaw nga maoy hinungdan sa pagbuto.

Si Labios miingon nga ang daan na kaayong mga LPG maoy mga hinungdan nga mohungaw ang gas nga sulod niini nga moresulta sa kalit nga pagboto.

Sa nasayran nga duha ang namatay ug 14 ang naangol sa kalit nga pagbuto sa LPG sa usa ka laundry shop ug naangin pa ang laing duha ka establisamento sa sulod sa building ni kanhi Bise Mayor Demetrio Cortes Jr. sa Paknaan, Mandaue kagahapon sa buntag.