Mga priso dili napud mabalhin

Dili pa segurado nga magamit dayon ang bag-ong gitukod nga bilanggoan diha sa Kalunasan aron maoy balhinan sa kapin sa 2,700 ka priso nga naghuot karon sa Bagong Buhay Rehabilitation Center (BBRC).

Ang maong bilanggoan nga padayon pa karong gitukod gihimoan og inspeksiyon kagahapon sa buntag sa mga opisyal sa kagamhanan human si Presidente Arroyo mipadayag sa iyang tinguha nga mabalhin na unta sa Kalunasan ang mga priso sa BBRC sa dili pa ang ASEAN Summit karong Disyembre.

Ang mihimo og inspeksiyon didto sa gitukod nga bilanggoan mao sila si Bise Mayor Michael Rama, DILG-Cebu City Director Patricio Gabuya, DPWH district head Necomedes Leonor ug BJMP regional Director Benito Dorigo.

Si Gabuya mitug-an nga gawas nga wala pay kaseguroan nga makumpleto pagkahuman ang maong bilanggoan sa dili pa ang Disyembre, maproblema usab kini tungod sa kakuwang og tubig.

Matud ni Gabuya naproblema sila kun asa magkuha og tubig nga magamit unya sa 2,700 ka priso.

Ang banabana mao nga ang kagamhanan mogasto og mga P650,000 ang buwan kun anha sila mokuha og tubig sa MCWD nga motuyo gyod pagbutang og dakung water reservoir sa Kalunasan, samtang P250,000 ang magasto kun anha sila mopalit og tubig sa water supply sa kooperatiba nga gipanag-iya sa mga lomulopyo sa Kalunasan.

Si Gabuya miingon nga gitun-an usab karon nga ang kagamhanan motuyo sa paghimo og deep well sa maong dapit nga kakuhaan nila og tinubdan sa tubig, apan ang maong proyekto mogasto usab og P10 ka milyon.

Ang 2,700 ka priso sa BBRC nagtinguha unta nga mabalhin na sila sa Kalunasan kay naghuot karon sila diha sa BBRC nga gihimo kaniadtong 1976 alang ra sa 250 ngadto sa 500 ka mga piniriso.

Ang prisohan nga gitukod sa kagamhanan diha sa Kalunasan gikuha gikan sa pundo sa nasudnong kagamhanan nga gitagana unta alang sa Philippine Drug Enforcement Agency.