Magtiayon gipusil; bana patay gyud

Namatay ang bana ug grabe usab ang kahimtang sa asawa kinsa gipamusil sa umagaron nilang lalaki sa Purok Mango, Opao, dakbayan sa Mandaue sa miaging gabii.

Ang namatay mao si Armando Tampus, 40 anyos ug ang grabeng naangol mao si Virgie, 39, nga asawa niini nga mga lumolupyo sa maong dapit.

Ang duha ka mga anak sa mga biktima nga sila si Maricel ug Arturo nga pulos hingkod ang panuigon nakasaksi sa insidente miingon nga kuyog sa ilang igsoon nga si Margie ang suspetsado nga si Rudio Almario, 27, nga kapuyo usab niini.

Nagsusi sa gipa-renovate nilang panimalay ang suspek ug si Margie ug daw wala magkasinabot nga maoy hinungdan nga nahitabo ang panaglalis.

Atol sa mainitong panaglalis, ang suspetsado kalit lang miibot sa giloklok niining armas ug namusil.

Si PO2 Cirilo Minoza sa Presinto 5 sa Opao Police Station nga gikahinabi sa Banat News miingon nga dali nga nakatubag sa alarma ang mga beat police sa Police Regional Office 11.

Ang suspetsado nasakmitan og armas nga kalibre .38 nga may upat ka kabhang sa bala ug gibalhog karon sa Opao Police Station.

Dugang pa ni PO2 Minoza nga dali nga gidala ang biktima sa Mandaue City District Hospital apan si Armando nga nakabaton og samad pinusilan sa bukobuko nakabsan sa kinabuhi .

Samtang si Virgie nga naigo sa dughan anaa sa higpit nga pag-atiman sa mga doktor.