Habalhabal driver gipusil sa pasahero, naigo's tangkugo

Samdan sa iyang tangkugo ang usa ka habal-habal driver human kini pusila sa iyang pasahero nga miilog sa iyang motorsiklo diha sa Pulangbato ning dakbayan kagahapon sa kaadlawon.

Ang biktima nga milandig sa North General Hospital giilang si Ruben Legaria,27, taga Common, Bacayan ning dakbayan.

Usa ka hamtong nga lalaki nga misakay kaniya gikan sa Canduman sa dakbayan sa Mandaue ang gitumbok nga mipusil sa biktima ug miilog sa iyang motorsiklong Ramjet nga nagkantidad og P30 mil.

Sumala pa sa imbestigasyon ni PO1 Allan Macatangay sa Talamban police station ang biktima gimandoan sa suspek nga magpahatud ngadto sa Pulangbato apan pag-abot nila sa atubangang bahin sa Bactus firing range mipara ang suspek.

Apan sa paghunong palang sa motorsiklo ang suspek kalit mibunot og wala matinong kalibre sa armas ug mianunsyo og holdap dungan sa pagpusil sa iyang tangkugo.

Ang biktima nga nalup-og sa karsada walay nahimo dihang gisakyan sa suspek ang iyang motorsiklo ug gibiyaan siya sa maong dapit.

Ang mga residente sa maong dapit nga nakabantay sa buto maoy mitabang sa biktima ug midala kaniya sa tambalanan.

Gususi pa karon sa kapolisan ang plaka sa maong motor sanglit wala usab kini mamemorya sa biktima.