Banilad sports complex hinganlan 'G. Ouano'

Mopalabang og balaodnon ang konseho sa dakbayan sa Sugbo nga nagtinguha pag-ilis sa pangalan sa Banilad Sports Complex ngadto na unya sa "Ananias G. Ouano Sports Complex".

Ang tumong ug tuyo niini aron mapahinungdan og kanunay'ng magpabilin sa panghunahuna sa mga Sugboanon ilabi na sa mga molupyo sa Banilad ang mga maayong binuhatan ni Konsehal Ouano dihang nag-serbisyo pa kini sa gobyerno.

Si Ouano unang napili pagka-konsehal sa Banilad niadtong 1968 ug pagka 1972 napili kini pagka barangay kapitan og nahimong presidente sa Association of Barangay Council (ABC).

Niadtong tuig 1998 hangtod sa 2001 napili kining konsehal sa dakbayan sa Sugbo ug iyang gihingusgan ang pagtukod sa na-establisar na karon nga Cebu City Senior Citizens Federation.

Si Ouano usab ang author sa naaprobahan nga ordinansa, C.O. No. 1686, nga naghatag og burial assistance sa tanang mga beterano sa gubat nga molupyo dinhi sa dakbayan.

Si Ouano usab ang responsable sa pagkatukod sa Office of Technical Staff sa ABC nga maoy moabag sa mga opisyal sa barangay pag-preparar sa program of Works and Estimates (POWE) ug pagpatuman sa mga proyekto sa kabarangayan.

Labaw sa tanan siya ang giila nga "The Father of Banilad" hinungdan nga mipasar og ordinansahon si Konsehal Edgardo Labella nga nagtinguha sa pag-ilis sa ngalan sa Banilad Sports Complex ngadto na sa pagka-Ananias G. Ouano Sports Complex.