Lalaki gibugalbugalan midunggab sa waiter

Lalaki nga nasuko kay gisungog midunggab sa mibugal-bugal kaniyang waiter diha sa dalan Carlock sa Sawang-Calero ning dakbayan niadtong Sabado sa gabii.

Ang biktima nga milandig sa Cebu City Medical Center giilang si Raul Gingone,34, usa ka waiter sa usa ka restaurant og residente sa Mambaling ning dakbayan.

Naaresto usab dayon sa mga higala sa biktima ang suspek nga si Reynante Janolino,25, kinsa kauban ra niya sa trabahuan.

Sumala pa sa imbestigasyon ni SPO3 Zenaido Pastorfide sa Homicide Section, samtang nagdala og tray nga puno sa mga baso ang biktima kalit lang kining gibabagan sa suspek ug gihansakan og kutsilyo makadaghang higayon.

Ang biktima nakaangkon og samad dinunggaban diha sa iyang tuong bukton ug sa tuong dughan. Ang suspek daling midagan palayo sa dapit apan gigukod kini sa driver sa ilang restawran nga si Edgar Garcia,32.

Ang biktima daling gidala sa CCMC samtang si Janolino gi-turn over ngadto sa mirespondeng sakop sa Mobile Patrol Group.

Nasuta nga dili palang dugay ang suspek ug ang biktima nagsukmagay human sungoga og "butsilaw" sa biktima si Janolino.