1 patay, 1 angol sa 2 pamusil sa pista

Usa ang namatay og laing usa ang naangol sa nahitabong pagpamusil sa managlahing lugar sa lalawigan sa Sugbo atol sa besperas sa kapistahan niadtong Sabado sa gabii ug kagahapon kaadlawon.

Ang unang insedente nahitabo pasado 6 sa gabii niadtong Sabado didto sa Manlapay, bukiran bahin sa Dalaguete samtang ang ikaduha nahitabo sa Sitio Magsipit, Liboron, Carcar.

Patay dihadiha human maigo sa ulo ug nabulit sa pinusilan ang kalawasan sa wala pa matino nga kalibre sa armas ang biktimang giila sa kapolisan nga si Valentino Empic alyas "Bobby" 30, dunay kapuyo ug nagpuyo sa Sitio Capoycapoyan, Manlapay, Dalaguete.

Suwerte nga wala apila ang iyang kauban nga si Bernebe Suares sa dihang gipusil sa wala mailhing tawo human sila atangi sa ngitngit nga dapit.

Si Marissa Bernado, kapuyo sa biktima, miasoy ngadto sa kapolisan nga mipalit og softdrink ang iyang kapuyo uban ni Suares.

Si PO2 Reynaldo Amaralliento sa Dalaguete sa pakighinabi sa Banat News miingon nga naglakaw sa dalan ang biktima ug si Suares apan kalit lang gipusil sa makadaghang higayon sa wala mailhing mamumuno ang biktima.

Ang kapolisan sa Dalaguete nagpadayon pa sa ilang imbestigasyon aron mailhan ang responsable ug ang motibo sa krimen.

Samtang sa laing bahin, nalandig sa tambalanan human maangol usab si Juan Carlos Wamar, 18, ulitawo nanimuyo sa Liboron Carcar human pusila ni Evarista Lausa, 30, nagpuyo sa Sitio Dapdap Poblacion.

Si Wamar naigo diha sa sampot agi sa 38 paltik rebolber nga maoy gigamit sa pagpusil ni Lausa.

Si Lausa nadakpan sa mga sakop sa Regional Mobile Group (RMG7) pinangulohan ni Police Insp. Alvin Balio nga naatol nga nagpatrolya ug gidakop human siya gitudlo nga maoy namusil sa biktima.

Nakuha sa posesyon mao ang 38 paltik rebolber tulo ka buhing bala, tulo ka empty shell.