Clean-up drive sa dakbayan gilusad kagahapon

Halapad nga pagpanglimpyo sa mga dagkong kadalanan ug mga publikong lugar sa dakbayan sa Sugbo ang gihimo kagahapon sa mga tinugyanan sa Cebu City River Management Council.

Si konsehal Nestor Archival maoy mirepresentar sa kagamhanan sa dakbayan nga maoy mangulo sa nagkalain laing sektor nga mi-abag sa pagpanglimpyo.

Dunay 29 ka mga nagkalain laing lugar ug kadalanan dinhi sa dakbayan ang nalimpyohan sugod sa buntag hangtod sa hapon.

Ang mga sakop sa CCRMC ug ubang sektor nanglimpyo sa Colon Area , Mango Avenue, General Maxilom ug sa Lahug.

Apil sa gilimpyohan ang dalan paingon sa South Reclamation Project (SRP) aron dili kini hugaw nga tan-awon sa mga tawo ilabina sa mga langyaw nga molabay sa maong lugar.

Tipik ug kabahin kini sa pagpanglimpyo sa dakbayan nunot ning nagsingabot nga Asean Summit karong bulan sa Disyembre.