Mestisuhong fetus gilabay sa Carreta

Usa ka pito ka buwan nga fetus ang daw basura lang nga gilabay sa iyang mga ginikanan ug napalgan sulod sa usa ka itom nga plastik sa basura diha sa sam-ang sa Carreta ning dakbayan kagahapon sa buntag.

Ang biktima nga usa ka mestisuhong batang lalaki nakit-an sa mga batang nanagduwa diha sa maong sam-ang kagahapon.

Sumala pang SPO1 Desiderio Mendaros sa Homicide Section base sa pamahayag sa usa ka residente diha sa maong dapit nga si Rolinda Haganas dunay babaye ug lalaki nga iyang nakit-an diha sa sam-ang una pa mapalgi ang maong puya.

Matud pang Haganas nga mestisuhon ug mestisahon ang babaye ug lalaking gibana-banang kapin 20 anyos pa ang pangidaron.

Ang duha gikatahong misulod sa maong sam-ang ug nagdala og bag nga kolor pula nga gihulagway ni Haganas nga bug-at ang sulod tungod sa pagkainat niini.

Nakapakuryoso ni Haganas mao ang linaktan sa mestisahong babaye nga "gakaang-kaang", iya unta kining gisundan apan ang iyang anak nga gikugos maoy nakapalangay niya hangtud nga nawagtang ang duha.

Dangtan pila ka minutos niyang pagpangita nakit-an niya ang duha nga nanagkot og kandila diha sa dakong krus, human niadto namatikdan ni Haganas nga gaan na kaayong tan-awon ang bag ug wala nay sulod dihang nanggawas sa sam-ang ang duha.

Matud pang Mendaros naghilak ang mestisahong babaye samtang nanglakaw gawas sa sam-ang.

Pila ka gutlo ang milabay nakit-an sa mga bata ang itom nga plastik bag nga gisudlan sa puya, patay na kini.

Gisubay na karon sa Homicide Section kung si kinsa ang maong babaye ug lalaki aron imbestigahon kung sila bay milabay sa maong puya.