Suspek posibleng polis ra usab sumala pang Gayotin

Duna nay gidudahan ang Cebu City Police Office kung si kinsa ang nag-inusarang tulisan nga mitulis ug mipatay nila ni Pilar Hernandez ug Wevina Pancho (basaha ang banner story) kagahapon sa buntag.

Si Cebu City Police Office director Melvin Gayotin sa pakighinabi sa Banat News mibutyag nga posibleng polis ra usab ang mitulis sa mga biktima.

"Tungod sa klase sa armas nga gigamit dunay posibilidad nga ang suspek suloguon sad sa balaod," asoy pang Gayotin.

Ang Scene of the Crime Operations nakakuha og lima ka basiyo ug usa ka buhing bala sa 9 mm nga kalibre nga maoy sagad nga isyu ngadto sa mga sakop sa kapolisan.

Ang driver ni Hernandez nga si Alfonso Evangelista sa pakighinabi sa mga tigbalita nagkanayon nga ang ulahing tawo nga iyang gihulagway nga polis nga diha sa buhatan una pa siya milakaw gibana-banang kapin 30 ang edad ug itomon ang pamanit.

Nagduda karon ang kapolisan nga posibleng polis ra usab ang suspek tungod kay di basta makasulod ang bisan kinsang tawo diha sa maong buhatan kung di makaila ang naa sa sulod.

Ang automatic door lock dili mahimong buksan gikan sa gawas sanglit ang button niini ngadto lang sa sulod duol sa lingkuranan ni Pancho.

Samtang ang nakit-ang paskin diha sa gawas sa pultahan dili iya sa PRH sumala pa ni Chuchie dela Peña usa sa mga kawani ni Hernandez nga naa sa field ang trabaho.

"Imposible gyud kaayong magbutang mi diha sa gawas ana (paskin) kay dili gyud mi ana mobuhat unya wala man sad mi mag-inventory," asoy pang dela Peña sa Banat News.

Sumala pang Chief Inspector Arnel Banzon ug Pastorfide nga posibleng gituyo kini og butang sa suspek aron di mahibaw-an ang nahitabo diha sa sulod.

Si dela Peña midugang nga nawala ang itom nga travelling bag nga maoy butangan sa binandol nga kwartang dad-on ni Hernandez ug nawagtang usab ang mga listahan sa tanang polis nga utangan gikan sa CCPO, Cebu Provincial Police Office ug Regional Mobile Group.