3 ka Akrho nadakpan

Tulo ka sakop sa Alpha Kappa Rho (Akrho) fraternity ug laing duha ka mga kauban ang nadakpan sa akto nga naghugawhugaw sa koral pinaagi sa pintal sa miaging gabii sa dalan J. Plaridel, dakbayan sa Mandaue.

Ang mga nadakpan mao sila si Alin Norca, 19, Jerry Soronio, 21, Clint Pepito, 21, Brandy Getarola, 20, nga pulos ulitawo ug usa ka 15 anyos nilang kauban nga pulos taga Pardo sa dakbayan sa Sugbo.

Ang tulo nga sila si Norka, Getarola ug Pepito pulos sakop sa Akrho fraternity base usab sa ilang pagpangangkon dihang gisukitsukit ni PO1 Charlie Rubio nga maoy desk officer sa Presinto 5 sa Opao Police Station.

Si PO1 Rubio nga gikahinabi sa Banat News miingon nga ang mga sakop sa Eco Warden sa dakbayan nga gipangulohan ni Leopoldo Herarman maoy nakadakop sa lima ka batan-on.

Dugang pa ni PO1 Rubio nga nagmarka ang lima sa koral nga semento sa daplin sa karsada sa dalan Plaridel nga nagpaingon sa Opao dihang nalabyan sa grupo ni Herarman nga maoy hinungdan nga gisikop.