Mipasangil vs. polis mibakwi sa pamahayag

Ang taxi driver nga unang mipasangil batok sa duha ka mga polis nga giingong nihimo og iligal nga operasyon diha sa lungsod sa Oslob niadtong milabay'ng semana mibakwi sa iyang naunang pamahayag kagahapon.

Ang maong drayber nga si Joselito Pastrano nga taga San Carlos City ug driver sa usa ka taxi unit nga nagbase dinhi sa Sugbo nagdala sa iyang linagdaang affidavit nga nibawi sa tanang pasangil batok sa maong mga polis.

Sa pakighinabi sa Banat News kang Pastrano iyang gibawi ang una niyang pamahayag atubangan ni Supt. Pablo Labra gumikan sa nakitang epekto niini ngadto sa duha ka mga polis.

Sa iyang bag-ong pangangkon, gi-hire siya nila ni Inspector Christian Antonio Garcia ug PO2 Dennis Tagolino nga pakyawon ang iyang taxi padulong sa Oslob aron pakigkitaan ang usa ka higalang Amerikano nga ginganlan og Per Giswold niadtong Septembre 4,2006 sa buntag.

Sa ilang sabot gipasaligan siyang bayran sa duha og P1,700 inig balik, apan nasagmuyo siya pagbalik dihang gitunulan lang siya og P500 sa duha ug gireklamo usab niya nga iya pang gastos ang gasolina.

Matud pa niya sa ila palang pagbiyahe pabalik sa Sugbo nadunggan niya ang duha nga naghisgut og mga tawong nalambigit sa iligal nga mga transaksyon.

Giangkon ni Pastrano nga tumo-tumo lang ang iyang gihimo sa pagbutang-butang sa duha ka mga polis nga duna silay gidakop nga drug pusher ug gi-areglo lang bugti sa bayad.

Sumala pang Pastrano nga tuyo niya sa pagreklamo niadtong Septembre 5 aron nga mapugos ang duha og bayad sa ilang kasabutan ug aron usab nga duna siya'y ikarason ngadto sa iyang agalon.

Apan niadtong adlaw'ng Huwebes matud pang Pastrano nga gibayran siya ni Tagolino og P2,000 nga gipaagi sa higala niyang usa ka sarhento sa militar nga nadestino sa Central Command.

Si Tagolino nga nadestino sa Negros Occidental Criminal Investigation and Detection Group gidis-armahan na sa iyang mga labaw sa CIDG7 ug gikuhaan sa iyang tsapa ug gisilutan og lima ka adlaw nga camp restriction. Samtang si Garcia nga nadestino sa Siquijor gikatakdang silutan usab sa iyang mga labaw sa Police Regional Office 7.