Ex-Army gipatay sa 2

Usa ka gikatahong ex-army ang gipusil dayon gidunggab makadaghang higayon samtang kini nagbarog diha sa basketbolan sa dalan F.Villa sa Sitio Santo Niño sa barangay T.Padilla ning dakbayan niadtong milabay'ng gabii.

Ang biktima kinsa dead on arrival nang miabot sa Cebu City Medical Center giilang si Ludovico Crisostomo,46, minyo ug residente sa maong dapit.

Sumala pa sa kapolisan duha ka mga lalaki nga naila lang sa ngalan nga sila si Harold ug Edgar maoy gitumbok nga miparegla sa biktima.

Matud pa sa imbestigasyon sa Homicide Section nga hubog kaayo ang biktima nga nagbarog-barog diha sa maong dapit ug kalit nga giduol sa mga suspek dayon gipusil makausa.

Human malup-og sa yuta, ang usa sa mga suspek maoy mitiwas og dunggab kaniya makadaghang higayon hinungdan sa hinanali niining kamatayon.

Ang kapolisan mihimo na og dugang pakisusi kung kinsa ang duha ka mga suspek.