Gitaktak sa CELLOOM pabalikon

Ang Department of Labor and Employment nimando na nga ipabalik na ang 12 ka kawani nga gitaktak sa CELLOOM furniture corporation sa barangay Canduman, Mandaue City.

Ang dose gitangtang niadtong Agosto 10 human kini nagtukod og unyon niadtong Agosto 9.

Gahapon nagpatawag sila og press conference sa mga nataktak nga kawani sa Celloom furniture apil na sa ALU TUCP ang unyon sa mga nataktak nga kawani.

Ilang gihulagway nga kasamtangan kadaugan ang desisyon sa DOLE central office, subay sa mando ni Labor Secretary Danilo Cruz.

Lakip sa pabalikon sa trabaho mao silang: Eliseo Masucol, Rocelo Bragat, Richard Velarde, Joel Rosel, Edmundo Roble, Benito Carbardo, Romancito Gulfa, Victoriano Lauronal, Rogelio Capungan, Reynaldo Olimba, Gerard Caputolan ug Rolando Camingking.

"If dili sila motuman sa kamanduan of course duna gyud mi legal option ana" matud ni Atty. Jose Boquecosa, abogado sa mga nataktak nga kawani.

Ang Vice President for Visayas sa ALU TUCP nga si Michael Mendoza nanghinaot nga respetohan sa management ang desisyon sa Labor department.

Karong adlawa gitakdang mobalik ang mga kawani sa CELLOOM Furniture apil sa taga labor department aron sila makatrabaho na og balik.