Abi og brown-out

Tulo ka residente sa Tungkil, Minglanilla nawad-an og kuryente tungod kay gipangawat ang mga wiring sa Visayas Electric Company (VECO) sa wala mailhing mga kawatan kagahapon sa kadlawon.

Ang mga biktimang si Concepcion Zamora, 54, Dulce Pareja, hingkod ug Emely Mabitad, 42, pulos residente sa maong lugar daling mitaho sa kapolisan sa Minglanilla sa maong insidente.

Base sa imbestigasyon sa kapolisan nga nahibulong ang tulo ka biktima sa pagmata nila nga wala silay kuryente nagtuo kini nga nag-brown -out apan sa pagsusi pa wala na ang mga wire sa kuryente nga nagkutay diha sa poste sa VECO paingon sa ilang mga balay.

Si SPO1 Romeo Barde desk officer sa kapolisan sa Minglanilla mibutyag kagahapon sa Banat News nga ang mga kawatan misaka sa poste sa VECO ug giputol ang mga wire nga nagkutay sa balay ni Zamora, Pareja ug Mabitad.

Gidala sa mga kawatan ang 60 metros nga wire sa kuryente ni Zamora, 70 metros kang Pareja ug 100 metros kang Mabitad nga nagkantidad ang tanan og tres mil.