Info caravan sa Medellin gidayeg

Kapin sa 500 ka mga molupyo sa nagkalainlaing barangay sa lungsod sa Medellin ang nakapahimulos sa bag-ohay lang gipahigayun nga information caravan sa Association of Government Information Officers sa rehiyon 7.

Ang kalihukan maoy labing una nga gihimo sa AGIO-7 sa lungsod sa Medellin.

Nagkalainlaing ahensiya sa gobyerno ang nidala sa tagsatagsa nila ka serbisyo ngadto sa lungsod.

Usa ka molupyo ang nakapadayag sa kalipay gumikan kay wala na siya mahasol sa pagbiyahe padulong sa dakbayan sa Sugbo aron paghikay sa iyang papeles bahin sa Government Service Insurance System ug uban pang ahensiya.

Kadaghan sa gisang-at nga problema sa mga molupyo atol sa maong information caravan mao ang kabahin sa loan, status contribution sa GSIS, Social Security System, renewal sa driver's license, student's license, clearance sa National Bureau of Investigation, authentication sa birth certificate, marriage certificates, legal advises ug uban pa.

Ang information caravan sa AGIO-7 gitumong sa paghatag sa tukmang kasayuran sa katawhan sa mga hilit nga lugar mahitungod sa serbisyo sa tagsatagsa ka ahensiya sa gobyerno.

Gisalmutan sa 26 ka ahensiya sa gobyerno ang information caravan sa lungsod sa Medellin.

Si Mayor Manreza Lim mapasalamaton sa AGIO-7 sa pagpasiugda sa kalihukan ug nanghinaut nga masubli pa kini sa ilang lugar.