Nadiskobrehan sa mga sakop sa Revenue Monitoring Task Force nga walay business permit ang kadaghanan sa mga manindahay diha sa Muslim Traders sa Colon hinungdan nga gipadalhan kini og demand letter aron kurihian niini ang mga kalapasan.
Apan giklaro ni Osmeña nga wala siyay problema bisan wala molukat og business permit ang maong mga manindahay basta ang importante nag-asikaso lang kini pagbayad og buhis diha sa City Treasurer's Office.
Gibasol sa mayor ang kuti nga mga proseso sa gobyerno alang sa paglukat og business permit nga maoy hinungdan nga daghan sa mga gagmay'ng negosyante bisan niadtong mga sari-sari store ang dili nalang molukat og permit.
Gitumbok sa mayor mao ang pag-apil diha sa mga rekisitos sa paglukat og business permit nga gikinahanglan pang mokuha og clearance gikan sa Social Security System (SSS) ug uban pang mga dokumento nga dili kaayo importante.