Tinguha ni Ate Glo sa BBRC hanap pa

Dili pa sigurado nga mahinayon ang tinguha ni Presidente Gloria Arroyo nga matigayon ang pagbalhin sa mga piniriso sa Bagong Buhay Rehabilitation Center (BBRC) ngadto sa Kalunasan Jail sa labing daling panahon sa dili pa ang Asean Summit karong Disyembre.

Hangtod karon wala pa makadawat si Mayor Tomas Osmeña og pormal nga kamanduan gikan sa presidente alang sa pagpabalhin sa BBRC didto sa Kalunasan.

Si Osmeña una nang mipadayag nga wala siyay mahimo ug mapugos sa pag-uyon sa higayon nga si Presidente Arroyo gyud mismo ang momando kaniya nga ipabalhin ang maong bilanggoan.

Si Osmeña maoy nangusog pagsupak sa maong plano tungod kay alang niya dili siya mosugot nga mabalhin sa Kalunasan ang maong bilanggoan kun magpabiling dili masumpo ang naghitak nga korupsiyon ug iregularidad sa maong bilanggoan nga gikunsabohan sa Bureau of Jail Management and Penology (BJMP).

Gihingusgan ang pagbalhin sa BBRC diha sa Lahug ngadto sa Kalunasan aron dili kini makahatag og negatibong epekto sa mga delegado sa Asean Summit nga anha moabot sa Waterfront Hotel sa Lahug.