Dili buot si Ruiz nga hutdon sa pagbalhin ni Quisumbing ang iyang planta sa Norkis Trading ngadto sa lungsod sa Compostela.
Matud pa ni Ruiz nga gusto siya nga estoryahan nilang tulo ang problema sa usag-usa alang sa kaayuhan sa dakbayan sa Mandaue.
"I will try to bridge Mayor Ouano and NQ (Norberto Quisumbing Jr.)," matud pa ni Ruiz.
Hinoon, sumala pa ni Ruiz nga dugay na siyang nasayud sa tinguha sa mga Quisumbing nga mangita og mas daku nga lugar alang sa iyang planta apan dili ang tanan.
Samtang igo lang nagpasalamat si Ruiz sa pagsalig ni Quisumbing kaniya nga padaganon sa pagka-mayor sa dakbayan sa Mandaue aron dili idayun ang pagbiya sa dakbayan.
Gipahibawo hinoon ni Ruiz nga kon dunay eleksiyon sunod tuig, magpapili siya pagbalik isip kongresista gumikan sa mahinungdanon kaayong komitiba nga iyang gikuptan alang sa Millenium Development Goal.
Nasayran nga ang giingong ka mahal na sa buhis sa dakbayan sa Mandaue ang hinungdan sa pagbalhin sa mga Quisumbing sa lungsod sa Compostela.
Giklaro usab ni Quisumbing nga walay sakop sa ilang pamilya ang interesado nga mopapili sa pagka-mayor nga maoy gituohang hinungdan sa bangi tali ni Ouano kinsa ang anak nga si Jonkie ang modagan sa pagka-mayor sunod eleksiyon.