2 tawo napalgan nagbitay

Duha ka tawo napalgang patay sa managlahing takna ug dapit sa lalawigan sa Sugbo nga gituohang naghikog pinaagi sa paghigot og pisi nga nylon sa ilang mga liog.

Ang mga biktima mao sila si Alexander Butlig, 27, minyo, nga lumad nga taga Alicia Ubay, Bohol ug Johnrey Cruz, 18, ulitawo ug tinun-an sa 3rd year high school sa maong dapit.

Ang duha ka biktima pulos kini naghigot og pisi nga nylon sa ilang liog ug pulos na kini patay nga napalgan sa ilang mga kabanay.

Sa nasayran sa Banat News kang SPO1 Wilfredo Rodriguez sa Presinto 5 sa kapolisan sa Opao Police Station nga gibati og kamingaw si Butlig sa unang pamilya nga atua sa Bohol.

Nagtinguha unta kining mopauli aron sa pagduaw sa iyang mga anak niini sa una niyang asawa apan gipugngan sa live-in partner niini sanglit wala silay kuwartang magamit.

Samtang ang ikaduhang naghikog ug namatay nga si Junrey Cruz, 18 anyos, ulitawo nga taga Casili, Consolacion napalgan usab nga nagbitay sa ikaduhang andana sa usa ka bakanteng panimalay nga gipanag-iya sa ilang silingan.

Si SPO1 Romulo Sasing sa kapolisan sa nahisgotang lungsod nga gikahinabi sa Banat News miingon nga ilang nasayran nga ang biktima gikasab-an kini sa amahan ug gituohang nahiubos kini nga maoy hinungdan nga naghikog.

Mga napalgang ebidensiya sa kapolisan nga mitubag sa maong alarma mao ang suicide note ug pisi nga nylon. Nasutang walay foul play ang maong mga paghikog.