Gubat vs bitok ilusad na karong Biyernes

Buksan sa kagamhanan sa dakbayan sa Sugbo ug sa Department of Education (Dep-Ed) karong Biyernes ang programang "Gubat Batok Bitok" nga gitumong aron mamentinar sa mga kabataan sa mga publikong tunghaan ang kahimsog sa panglawas.

Si Mayor Tomas Osmeña ug si Dr. Leonilo Oliva, schools division superintendent maoy mangulo sa maong kalihukan nga sugdan sa alas 9 sa buntag diha sa Guadalupe Elementary School.

Gipaabot sab nga motambong ug mohatag sa iyang mensahe si Cebu City First Lady Margot Osmeña nga maoy tsirman sa Cebu City Commission for the Welfare and Protection of Children.

Mokabat sa P2 milyones ang gipagawas nga pundo sa dakbayan alang ning maong kalihukan aron mapurga ang mga tinun-an sa dili mominos 68 ka mga publikong tunghaan sa elementarya dinhi sa siyudad.

Subay sa gihimong pagtuon sa National Institute of Health sa University of the Philippines-Manila ang bata nga bitukon makasinati og dili himsog nga panglawas ug maapektuhan usab ang pagtuon niini.

Kini maoy nag-unang hinungdan nga gilusad sa siyudad sa Sugbo ang maong programa aron mapreserbar ang kahimsog sa panglawas sa mga tinun-an ilabina kadtong naggikan sa kabus nga pamilya.