National ID system mosumpo insurhensya

Gipaabot sa militar nga ikapatuman ang national ID system (NIS) sa nasud aron labing maila ang mga rebeldeng New Peoples Army (NPA) ug uban pang sakop sa grupong terorista dinhi sa nasud.

Mao kini gibutyag ni Col. Oscar Lasangue, tigpamaba sa Civil Relations Group (CRG) sa Armed Forces of the Philippines (AFP) nga nagbase sa Lahug ning dakbayan.

Miingon si Lasangue nga sa pagkakaron gidebatihan pa sa senado ang maong balaodnon tungod kay daghan pang nabalaka kalabot niining NIS.

Miingon si Lasangue nga ang usa ka tawong way tinagoang sekreto sa iyang pagkatawo, dili mahadlok niining NIS.

Kining maong sistema maghatag og usa na lamang ka ID sa matag tawo nga kon naa siya niana, kapiyalan na siya sa bisan unsang okasyon nga siya maayog rekord nga tawo.

Gani matud pa ni Lasangue nga kon moabot ning higayona, dili ra kaayo bagal ang usa ka pitaka, ilabi na sa mga lalake nga ang pitaka anha ipaslak sa likod nga bulsa kay usa na lang ka ID ang iyang dad-on, lahi sa pagkakaron nga ang makapabaga sa pitaka dili kuwarta, kondili mga ID ug mga resibo sa utang.

Si Lasangue nagkanayon nga puwerteng hadloka sa mga komunistang rebelde ug mga terorista niining NIS kay maglisod man sila sa pagkupot niini.

Usa sa hinungdan mao nga matuki ang ilang rekord kon unsang matang ang ilang pagkatawo ug baroganan sa kinabuhi, busa dili sila kahatagan niini.

Maoy hinungdan nga mao kining mga tawhana ang mibabag sa mga magbabalaod paglig-on sa anti-terrorism bill nga nag-ong-ong pa karon sa senado.

Ang pagbaton og usa ra ka ID gipatuman sa nagkalainlaing nasud sa kalibotan ug nasayrang epektibo kaayo ang maong sistema matud ni Lasangue.

Gituohan ni Lasangue nga dili makapiog ang mga komunistag hunahuna nga magbabalaod sa pagpalabang ning NIS sa senado.