Kapin sa 20 ka mga vendors diha sa Muslim Traders ang gipadalhan og demand letter sa kagamhanan sa siyudad sa Sugbo kagahapong adlawa.
Kini human masakpi sa gipahigayong pakisusi sa mga sakop sa Revenue Monitoring Task Force nga walay business permit ang sagad sa mga vendors sa maong lugar.
Matud ni Cristopher Ong, hepe sa Revenue Task Force nga pito ka adlaw lang ang gihatag nga tagal sa maong mga vendors sa pag-asikaso og lukat og business permit.
Sa higayon nga mapakyas og asikaso sa ilang business permit ang maong mga vendors human sa maong tagal sunod nga himuon sa siyudad mao ang pagpadala og notisya aron pasirad-an na ang maong mga pamatigayon.
Gitug-an ni Ong dihang nahinabi sa Banat News nga dunay pipila ka mga vendors ang mibasol ngadto sa usa ka opisyal sa City Hall nga maoy nipasalig kanila nga walay angay'ng kabalak-an bisan og wala kini business permit.
Gibuksan ang Muslim Traders diha sa Colon niadtong tuig 2003.