Babaye misukol sa tulisan gipusil

Samdan sa iyang duha ka bitiis ang usa ka 20 anyos nga dalaga human kini misukol sa nag-inusarang tulisan diha sulod sa giluwanan niining PUJ sa dalan Lincoln diha sa Ermita ning dakbayan niadtong milabay'ng Lunes sa hapon.

Ang biktima giilang si Pinky Libres, 20, taga Gorordo Avenue, Camputhaw ning dakbayan.

Sumala pa sa kapolisan sa Carbon police station, ang biktima luwan og usa ka PUJ nga nagsubay diha sa nahisgutang dapit dihang usa ka wala mailhing lalaki nga pasahero usab sa maong PUJ kalit nga mibunot og armas.

Ang suspek mition niini ngadto sa biktima ug mideklarar og tulis ug gilabnot ang cellphone niini nga kasamtangan niyang gikuptan.

Apan ang biktima wala mobuhi sa maong cellphone ug nakiglayog sa suspek hinungdan nga gipusil siya sa tulisan diha sa iyang duha ka bitiis.

Ang biktima bisan samaran wala gihapon buhii ang suspek hangtud nga silang duha nangatagak sa PUJ diin nakahigayon ang suspek og dagan palayo dala ang cellphone sa biktima.

Usa ka Rudy Lintag nga taga San Roque ning dakbayan nga nakakita sa biktima maoy daling miagak kaniya pangadto sa usa ka pribadong tambalanan.