Si Arroyo moabot diha sa Mactan Air Base sa alas 10 sa buntag ug modiretso sa maong hotel alang sa maong panagtigum.
Ang presidente maoy pinasidunggang dinapit sa maong kalihukan diin siya mohatag og 20 ka minutos nga speech alang sa mga delegado.
Gipaabot nga kauban ni Arroyo mao sila si Department of Health Secretary Francisco Doque, Department of Tourism Secretary Ace Durano ug Serge Remonde sa Regional Development in Central Visayas.
Wala hinuon ibutyag sa Philippine Information Agency kung unsay hisgutan ug tukion sa pangulo sa maong pagbisita apan gipaabot nga may kalambigitan kini sa edukasyon ug sa teknolohiya.
Una pa ang maong speech, usa ka video presentation gikan sa 2nd National ICT Basic Education Congress ang ipasundayag samtang si Roberto Romulo nga tsirman sa Foundation for Information Technology Education and Development In. maoy mopaila sa pangulo ngadto sa mga delegado.
Lakip sa trabahuon sa presidente mao ang pakigtagbo sa mga eskperto sa teknolohiya ug edukasyon gikan sa nasud sa Australia nga si Gerry White, ang chief executive officer sa Education a.u.Limited ug Secretary Ramon Sales sa Commission on Information and Communications Technology.
Dugang sa mosalmot sa diskusyon mao si DepEd secretary Jesli Lapus kinsa mopresentar sa mga estratehiya ug mga plano sa maong ahensya alang sa ICT.
Human sa maong tigum, ang delegasyon ni Arroyo mobalik ngadto sa Isla sa Guimaras aron susihon ang padayong operasyon sa paglimpyo sa oil spill didto.