2 batan-on gitabangan og kulata; 1 gidunggab

Duha ka batan-on ang giatangan ug gitabangag kulata ug usa kanila ang gidunggab sa gidudahang mga sakop sa gang diha sa dalan M.J. Cuenco sa barangay Tejero ning dakbayan kagahapon sa kaadlawon.

Ang mga biktima giilang sila si Ronillo Presbitero, 24, taga Basak ning dakbayan ug Herbert Armision, 21, residente sa San Miguel, barangay Apas ning dakbayan.

Sumala pa sa imbestigasyon sa Homicide Section, ang duha gikan pa miduaw sa ilang mga higala diha sa Tejero nianang sayo ug sa ilang pagpauli nag-atang sila og PUJ dihang giduol sa mga suspek.

Matud pa ni Armision ngadto sa kapolisan walay daghang pangutana gitabangan sila og kulata sa maong grupo hinungdan sa ilang pagdagan palayo.

Apan si Presbitero maoy nagunitan ug gidunggab sa usa sa mga suspek gamit ang usa ka kutsilyo human sa hitabo daling nangikyas ang mga suspek samtang gidala sa Cebu City Medical Center si Presbitero.