Anak ni kap sa Labangon konsehal na

Mi-asumer sugod kagahapong adlawa ang anak ni Labangon barangay captain Felix Abella nga gitudlo isip bag-ong kagawad sa nahisgutang barangay.

Si Engr. Norvic Abella, pormal kining nanumpa sa buhatan ni Mayor Tomas Osmeña kagahapon sa buntag ug pagka human misugod dayon sa iyang gitahas nga responsibilidad isip bag-ong sakop sa konseho sa barangay.

Nasayran gikan kang Abella nga si Norvic maoy napili-an sa mga sakop sa konseho sa barangay ug ni Osmeña mismo nga itudlong hulip sa namatay nilang konsehal nga si Celso Dagatan.

Si kanhi kagawad Dagatan namatay kini sa pangidaron nga kapin sa 80 anyos niadtong miaging tuig apan wala dayon makahigayon sa pagpangita og ikahulip ang mga opisyal sa barangay.

Pipila ka mga political observer sa Labangon mitug-an sa Banat News nga si Norvic maoy gi-groom karon ni Abella nga mokandidato pagka kapitan hulip kaniya sa eleksiyon sa barangay sunod tuig tungod kay anaa naman sa ikatulo ug katapusang termino ang kapitan.