Bulag nga summit sa mga walhon ok ni Tom kun...

Wala mahulga si Mayor Tomas Osmeña sa walhong pundok nga nagtinguha nga mopahigayon og linaing kalihukan nga maoy i-atbang sa nagsingabot nga Asean Summit karung bulan sa Disyembre.

Apan gipasidan-an nang daan sa mayor ang maong grupo nga himuong malinawon ang pagpahigayon sa gilaraw niining kalihukan ug dili mag-abusar sa iyang pagtugot.

Giprangkahan ni Osmeña ang mga walhong pundok nga lahi kun pagpangilkil na ang hisgutan gumikan kay supak kini sa gimbut-an sa balaod.

Giklaro sa mayor nga legal ang planong paglusad og linaing summit sa mga walhong pundok gumikan kay duna kiniy katungod nga mopahigayon og malinawon nga asembliya gawas lang kun magmugna kini og mga bayolinting kalihukan.

Hinuon subsob nga monitoron sa mayor ang kalihukan sa mga militanti og walhong pundok aron seguradong luwas ug magmalinawon ang pagpahigayon sa Asean Summit karong Disyembre.

Apan bugtong hatagan og prayoridad ang pag-monitor sa mga suicide bomber nga sakop sa mga terorista kaysa rebelding New Peoples Army (NPA).