Ang maong grupo gilangkuban og usa ka aktibong opisyal sa kapolisan ug tulo ka mga aktibo usab nga mga polis lakip na ang usa ka sibilyan nga ilang "asset."
Si Supt. Pablo Labra sa CIIB sa pakighinabi sa Banat News mibutyag nga dunay usa ka taxi driver ang mireklamo diha sa ilang buhatan kabahin sa pag-ilad kaniya sa maong mga polis.
Gikatahong gigamit ang iyang taxi sa maong mga polis ug siya'y gihimong drayber samtang mipahigayon sa ilang "operasyon" sulod sa tulo ka adlaw diin gidala ang iyang taxi didto sa lungsod sa Oslob ug Carcar.
Giingong dunay gihimong raid batok sa mga drug personalities ang maong mga polis.
Matud pa sa reklamo sa maong drayber nga nasagmuyo siya dihang human sa operasyon wala siya bayri sa maong mga polis, hinungdan sa iyang pagdangop sa buhatan sa CIIB kagahapon sa buntag.
Si Labra sa iyang bahin nagkanayon nga mao kini ang grupo sa mga polis nga ilang gipanid-an tungod sa paggamit sa grupo sa pangalan sa CIIB ug Criminal Investigation and Detection Group atol sa ilang operasyon.
Ang maong grupo gikatahong manakop og mga drug personalities apan dili dad-on sa bisan asang presinto kundili ila rang aregluhon diha sa gawas bugti nga sila buhian.
Matud pang Labra nga nag-operate usab ang maong grupo diha sa barangay Luz, Calamba ug Tejero lakip na sa dakbayan sa Talisay.
Pipila na ka bulan ang milabay, ang CIDG mipahibalo ngadto sa publiko kabahin sa mga polis nga mogamit sa ilang pangalan nga mangronda diha sa kalungsoran nga walay pagtugot sa ilang buhatan ug mihimakak nga ilang mga sakop ang maong grupo.
Si Labra mitug-an nga nahibaw-an na niya kung si kinsa ang maong mga polis lakip na diin sila madestino apan midumili sa pagbutyag niini.
Sa impormasyong nadawat sa Banat News sakop gihapon ang maong mga polis (mga ngalan gipugngan) sa Police Regional Office 7 ug nalambigit na usab sa mga anomalya ug pagpangilkil kaniadto.
Mihimo na karon og dugang pakisusi ang CIIB kabahin sa maong reklamo ug sa pagpalig-on sa ilang kaso batok sa maong mga polis.