Pagsaway gidawat na ni Mayor Soc

Gidawat na ni Mayor Socrates Fernandez ang negatibong impresyon sa mga Talisaynon ug ang pagtuo nga dako og epekto sa iyang politikanhong kaugmaon ang nahitabo sa iyang adopted nga anak nga si Joavan.

Sa susamang kalambuan, gipahibalo ni Supt. Romeo Perigo nga positibo ang resulta sa paraffin test ni Joavan, dungan sa taho nga usa sa biktima ni Joavan nga si Timoteo Aleo miluwat og affidavit of desistance sa kasong frustrated murder.

Si Fernandez miasoy sa Banat News nga dawaton na lang niya ang mga bati nga pagtan-aw diha kaniya tungod sa nahidangatan ni Joavan.

Matud niya nga mahibaw-an lamang ang tinuoray'ng hukom sa katawhan diha kaniya isip mayor sa Talisay karong sunod piniliay.

Apan gitataw niya nga wala siya magpabaya sa iyang katungdanan isip mayor sa Talisay.

Nagsugod pagpang-gawas ang mga pagsaway diha ni Fernandez human niya gitagotago ang resulta sa paraffin test ni Joavan.

Giklaro hinuon ni Fernandez nga girespeto lamang niya ang desisyon sa abogado sa iyang anak nga dili ipabutyag ang resulta sa paraffin test ug nagdili kaniya pagpanubag sa mga pangutana kabahin sa insidente nga naglambigit sa iyang anak.

Si Talisay City Prosecutor Marcial Rubia kagahapon miasoy sa Banat News nga wala pay naabot nga affidavit of desistance gikan ni Aleo, kinsa nahauna nang gikataho nga moatras sa kasong gipasaka batok ni Joavan.

Apan matud ni Rubia nga dili na magsilbe ang affidavit of desistance batok ni Joavan tungod kay nasang-at na sa korte ang kasong frustrated murder.