Mobiyahe agi sa Mandaue pasayuhon na - Tedman

Giawhag sa buhatan sa Traffic Effeciency Development and Management (TEDMAN) ang katawhan sa Talamban, Lahug, Mabolo ug uban pang dapit sa dakbayan sa Sugbo nga himuon ang sayong oras kun ang ilang pagbiyahe moagi sa dakbayan sa Mandaue.

Kini aron kalikayan ang kalangan sa gikatakdang oras sanglit makasinati man kini og kahuot sa trapiko tungod sa pagpasira sa flyover sa Maguikay.

Si Domingo Cortes , media liaison officer sa TEDMAN, miasoy sa Banat News nga naglakip niini ang mobiyahe sa Mactan Cebu International Airport (MCIA) nga nagkinahanglan ang paggikan og sayo sa dili pa ang oras sa ilang pagsakay sa ayroplano.

Matud pa ni Cortes nga ilang paningkamutan nga kaminusan ang kalangan sa oras sa pagbiyahe sa mga motorista nga moagi sa kadalanan sa Mandaue pinaagi sa pag-usab sa mga rota sa mga sakyanan.

Dugang pa niya nga may mga kausaban sa ilang gipahibalo nga mga rota sa sakyanan sa Maguikay tungod sa ilang nakita nga bul-og sa mga sakyanan sa lungsod sa Consolacion.