Karaang city hall bldg peligrong di mahuman

Namilegro nga dili mahuman ang nagpadayon karon nga renovation sa karaang Cebu City Hall human dili pabor si Mayor Tomas Osmeña nga mopagawas og dugang P60 milyones nga pundo ang siyudad aron sa pagpatiwas sa proyekto.

Gipasabot sa mayor nga una nang migahin og P60 milyones nga pundo ang siyudad alang sa renovation sa karaang City Hall diin nahimutang ang opisina sa mga konsehal ug bise mayor.

Apan sa punto nga pun-an kini og laing P60 milyones aron pagpatiwas ug pagkumpleto na unya sa maong edipisyo gitubag kini sa mayor nga dili niya prayoridad ang maong lakang.

Gihimong basehanan sa mayor ang Annex Building nga dunay walo ka andana nga migasto lang og P70 ngadto sa P80 milyones nga mas minus kun itandi sa gi-renovate nga upat ka andana nga karaang City Hall nga mogasto unya og P120 milyones kun ka-aprobahan ang dugang pundo.

Giklaro sa mayor nga dili siya paborable sa maong plano bisan pa man og dunay igong pundo nga magamit ang siyudad alang sa maong katuyoan gumikan kay alang niya sobra ra kaayo ang gasto niini.

Sa pagkakaron nagasto ang siyudad og P700 mil ang bulan alang sa binulang abangan sa mga konsehal ug ubang mga departamento nga temporaryong nag-abang diha sa City Savings Bank Building sa Osmeña Boulevard ug Yotivo Building.

Matud sa mayor nga mas maayo nga magpadayon lang una sa pag-opisina sa maong dapit ang mga konsehal ug ang ubang mga buhatan kay sa magdalidali sa pagpagawas og dugang dako nga pundo aron lang ipatiwas ang dako kaayong gasto sa gi-renovate karong karaang City Hall.