Vidal gi-briefing para summit

Gihatagan og tukmang kasayuran sa kadagkuan sa National Organizing Committee si Arsobispo Ricardo Cardinal Vidal sa kasamtangang dagan karon sa pagpangandam sa 12th Association of Southeast Asian Nation (Asean) Summit karong Disyembre.

Ang paghatag sa tukmang kasayuran ngadto kang Cardinal Vidal natigayon sa ilang gihimong pagpakigtagbo niini niadtong miaging adlaw.

Si Ambassador Marciano Paynor nga maoy chairman sa National Organizing Committee ug Ambassador Luis Cruz sa Department of Foreign Affairs, Office of Asean Affairs maoy nangulo sa pagpakigtagbo sa arsobispo.

Ang mga sakop sa Cebu Utilities Group sa Sugbo nga gipangulohan sa ilang chairman nga si Paul Hubahib ang kuyog usab sa ilang pagpakigtagbo alang sa pagpangayo og panalangin sa arsobispo.

Gitumong kini sa kaluwasan sa ilang mga sakop nga mopahigayon sa pagpahapsay sa linya sa kuryente ug mga telepono alang sa pagsiguro sa kahimtang sa mga sugang dagitab ug telepono atol sa Asean Summit sa Sugbo.

Si Cruz sa iyang pamahayag miingon nga malaumon siya nga mahuman ang kaugmaran sa Cebu International Convention Center (CICC) sa gikatakdang adlaw sanglit anaa na man kini sa 76 porsiyento nga pagtapos.

Si Gobernador Gwendolyn Garcia gitambagan ni Cardinal Vidal nga himuon niini ang matag adlaw nga pagbisita sa CICC aron matan-aw ang dagan sa pagtrabaho ug matubag gilayon ang motumaw nga problema.