4 ka dalan sa M'daue gipanindot

Gisugdan na sa kagamhanan sa dakbayan sa Mandaue ang kaugmaran sa pagpatahom sa upat ka mga dalan nga maoy mahimong agianan sa mga delegado nga motambong sa 12th Association of Southeast Asian Nation (Asean) Summit.

Samtang ang mga dalan nasyonal ang ubos usab kini sa Department Public Works and Highways (DPW H) nga naglakip sa Flyover sa dalan M.C. Briones ug A.C. Cortes sa Maguikay sa nahisgotang dakbayan.

Naglakip sa ilang gihimo sa maong mga dalan mao ang pag-ayo sa mga guba, pagpatahom sa palibot ug ang pagpahimutang sa labing daghang mga sugang dagitab.

Si Mayor Thadeo Ouano nga gikahinabi sa Banat News miingon nga ang 90 ka set sa mga sugang dagitab sa mga lokal nga dalan sa dakbayan gisugdan na pagpanaod.

Mokabat sa P25 milyones ang gigahin alang sa maong kaugmaran nga gitumong alang sa pagpabuhagay sa kahayag sa palibot sa dakbayan sa panahon sa gabii.

Naglakip sa mga dalan nga ipahimutang ang mga sugang dagitab mao ang dalan Plaridel, C.D. Seno, W . O. Seno, ug E.O. Perez ug ang palibot nga mga dalan sa CICC sa reclamation area.