Atol sa usa ka press conference nga gipahigayon sa Ecotech Center kagahapon sa buntag si Gullas gipasalamatan sa mga opisyales sa Dep-Ed Regional Office 7 pinaagi ni Regional Director Dr. Carolino Mordeno, Asst. Director Gloria Penili, kanhi mga Regional Directors Dr. Eladio Dioko ug Dr. Pablo Antopina ug Cebu City Schools Division Superintendent Dr. Leonilo Oliva.
Sa maong panagtigum gihulagway ni Dr. Dioko ang sinugdanan sa maong pagkatukod sa maong Payroll Regionalization diin nagsugod kini sa dihang anaa pa siya sa serbisyo sa edukasyon kansang reklamo sa mga magtutudlo sa kalangay sa ilang mga suholan gumikan kay didto pa magsumikad sa kaulohan ang ilang mga sweldo.
Labaw sa tanan ang mga illegal deductions sa payroll, insurance ug ang problema sa mga loan sharks diin mapugos nalang sa pagbaligya ang mga magtutudlo sa ilang mga sweldo ngadto sa mga tigpatanto.
Sa panahon ni kongresista Jose Dodong Gullas nga nakasabot sa maong problema gipangamahanan ang House Bill no. 2542 nga mag-regionalized sa payroll system sa mga magtutudlo human nga gipadangat ni Dioko ang maong mga problema.
Matud pa ni Gullas sa iyang pagpadangat niini ngadto sa hawanan sa Kongreso kini milampos human kini maaprobahi niadtong Oktobre 23, 2002 apan pag-abot pa sa Senado wa na kini maglihok gumikan kay ang uban kanila dili pabor sa maong bill.
Apan gumikan sa iyang pagduol ug pagpangayo og tabang ni kanhi Dep-Ed Sec. De Jesus kini milampus human nga si de Jesus miluwat og memorandum circular sa pag-implementar sa regionalized payroll services niadtong tuig 2004.
Gumikan sa maong kalambuan ang mga magtutudlo nawagtangan na sa ilang mga problema sa ilang suhulan gumikan kay "on time" na kining moabot pagtapos sa bulan, sukwahi sa milabay'ng panahon nga moabot ang sweldo sa magtutudlo lima ngadto na sa usa ka tuig nga dili masweldohan.
Usa sa nagpasalamat mao ang Schools Division Superintendent sa Iligan City nga si Dr. Lourdes Tulod gumikan kay ang mga bag-ong magtutudlo nga gi-hire sa Dep-Ed nakakuha dayon sa ilang suhulan pagkasunod bulan sa ilang pagserbisyo.
Matud pa ni Dr. Tulod kinahanglan nga pasidunggan ug pasalamatan si Cong. Jose Dodong Gullas sa iyang pagtabang sa mga magtutudlo lukop nasud nga miimplementar na niining Payroll regionalization nga anaa mahimutang sa mga rehiyonal nga buhatan sa Dep-Ed.