Duha gisignit sa Talisay

Duha ka mga gidudahang sakop sa New People's Army ang gikatahong gisignit sa mga gidudahang sakop sa kapolisan diha sa South Central Market sa barangay Lawaan dakbayan sa Talisay niadtong milabay'ng Biyernes sa hapon.

Ang human rights group nga Karapatan miila sa mga gisignit nga sila si Gerard Labadia, 35, taga Labangon ug Sharon Abangan, 34, nga taga sitio Salvador, Tabunok sa dakbayan sa Talisay.

Si Dennis Abarientos ang presidente sa Karapatan dinhi sa Sugbo mitug-an sa Banat News nga daghang nakakita nga mga polis ang misignit sa duha apan ilang gikabalak-an mao nga basin duna nay dautang nahitabo sa duha sanglit dihang ilang gisubay sa Camp Sotero Cabahug wala silang duha didto.

Matud pang Abarientos nga dunay usa ka taxi drayber sa Worldwide taxi nga apilyedo ray ilang nakuha nga "Soriano" ang mitug-an kanila nga diha gidala sa maong kampo ang duha nga gipasanginlang mga sakop sa "NPA."

Midugang si Abarientos nga si Labadia maoy tigpamaba sa Estrada Resign Movement kaniadto apan nag-negosyo na og computer web design isip maoy iyang pangabuhian samtang si Abangan kanhi sakop sa Bantay Dagat ug lokal nga campaigner sa militanteng pundok nga Anakpawis.

Gikatahong nakatawag pa si Labadia ngadto sa igsuon niini nga diha sila gidala sa maong kampo human sa ilang pagkaaresto.

Gibasol karon ni Abarientos si Gobernador Gwendolyn Garcia tungod sa deklarasyon niini og "all out war" batok sa insurhensya.

"Sa akong bahin, kabahin gyud ni sa 'all out war' nga polisiya ni Gov. Gwen Garcia, wala gyud ni kapasikaran ang pasangil nga NPA ni sila, kay ang NPA naa ra man sa bukid magdala-dala og armas," asoy pang Abarientos.

Walay bisan usa ka police unit nga nagbase sa Camp Sotero Cabahug ang miangkong sila maoy midakop sa duha.

Apan sa nakaylap nga mga impormasyon gikatahong nakuhaan ang duha og duha ka kalibre 45 nga pistola, usa ka laptop, P250,000 nga kwartang gikatahong gikan sa usa ka magpapatigayong Hapon nga ilang gikilkilan, usa ka granada ug mga subersibong dokumentos.

Usa sa gidudahan ni Abarientos nga may kalambigitan sa operasyon ang militar.

"Iligal ug baseless gyud ning pagkadakop nila, pagdakop palang daan highly irregular na ni, manubag gyud ni si gob, apil na usab si Paul Labra ug Gayotin,it is a matter of command responsibility," pasangil pang Abarientos.

Apan dihang gipangutana sa Banat News kung dunay nakakita sa duha ka opisyal diha sa gikahitaboan, si Abarientos nagkanayon nga isip mga opisyal sa maong kampo duna silay tulubagon.

Si Supt. Melvin Gayotin sa pakighinabi sa Banat News kusganong mihimakak og kalambigitan sa maong kaso.

Matud pa sa opisyal, posibleng nasaypan lang sila sa Karapatan sanglit dili nila hurisdiksyon ang Talisay City.

Ang Karapatan milusad og piket line diha sa atubangan sa maong kampo kagahapon, samtang gikatakdang isang-at nila ugmang adlawa sa korte ang petition for writ of habeas corpus aron ipagawas sa awtoridad ang duha.