Naa sa top 5 drug pusher

Usa ka top 5 sa watchlist nga pusher sa kapolisan sa sitio Buyong, barangay Maribago, dakbayan sa Lapu-Lapu ang nadakpan sa kapolisan sa buy bust operation nga gipahigayon sa miaging gabii.

Ang nadakpan mao si Eduardo Norte Pangatungan alias Eddie o Waray, 41 anyos, minyo nga nagpuyo sa Bagong Bayan sa Maribago sa maong dakbayan.

Ang grupo ni SPO1 Honorato Dodong Tano sa Intelligence and Investigation Section sa kuwerpo sa kapolisan sa maong dakbayan maoy nakasikop sa suspetsado.

Ang mga ebidensiya nila ni SPO1 Tano nga ilang nasakmit gikan sa suspetsado ang 11 ka paketeng shabu, P600 nga salapi nga gituhoan nga halin sa shabu ug uban pa.

Si SPO1 Tano nga gikahinabi sa Banat News miingon nga dugay na nilang gipanid-an ang mga ilegal nga kalihokan sa suspetsado nga maoy hinugdan sa pagkasikop niini.

Ang kasong kalapasan sa Secion 5, 11, 2 ug Article 2, Republic Act 9165 kun Comprehensive Dangerous Drug Act of 2002 maoy gipasaka sa kapolisan sa dakbayan batok sa maong dinakpan kinsa nagtingkagol na karon sa bilanggoan.