Resulta's paraffin test ni Joavan gitago ni Bro Soc

Si Talisay City Mayor Socrates Fernandez nagdumili sa pagbutyag sa resulta sa paraffin test sa iyang anak nga si Joavan kinsa maoy suspetsado sa pagpusil patay sa usa ka drayber ug sa konduktor ug laing duha ka lalaki.

Matud ni Fernandez sa pakighinabi niini sa Banat News kagahapon sa hapon nga gidid-an siya sa ilang abogado og hatag og mga pamahayag kabahin sa hitabo lakip na ang resulta sa paraffin test.

Kahinumduman nga niadtong milabay'ng adlaw gidala ni Fernandez si Joavan diha sa crime laboratory 7 aron makuhaan og paraffin test human nabati sa mayor nga ang iyang anak maoy suspek sa pagpamusil.

Human sa pagpakuha og paraffin test gitugyan ni Fernandez si Joavan sa kapolisan sa Talisay aron maimbestigar ug malimpiyo ang pangalan niini.

Apan si Joavan maoy gitumbok nga usa sa suspetsado sa insidente ug gipasakaan na kini og kasong frustrated murder ug murder sa pamilya sa mga biktima.

Si Supt. Romeo Perigo, hepe sa kapolisan sa Talisay sa pakighinabi niini sa Banat News kagahapon sa buntag namalibad nga wala siya'y kalibutan sa resulta sa paraffin test.

Matud ni Perigo nga ang pagkuha sa resulta sa paraffin test adunay proseso kun kinsa ang mi-request niini mao usab ang mokuha sa resulta hinungdan nga wala siya'y kalibutan sa resulta.