Daginot sa tubig gitinguha

Giawhag ang mga Sugboanon nga motabang sa pag-preserbar ug ingon man sa pagdaginot sa tubig aron malikayan ang suliran sa posibleng pagnihit sa tubig dinhi sa Metro Cebu sa mosunod nga mga adlaw.

Mao kini tumong sa paglusad sa tinuig nga kalihukan sa Water Conservation Month nga gitambungan sa nagkalainlaing opisyal sa mga ahensya sa gobyerno didto sa mayor's conference room sa Cebu City Hall kagahapon sa buntag.

Si Bise Mayor Michael Rama nga maoy usa sa mga mamumulong mi-apelar ngadto sa mga Sugbuanon nga ampingan ug magdaginot sa paggamit sa tubig aron dili masinati ang gikabalak-ang problema sa umaabot nga mga adlaw.

Apil na niini ang pagpanglimpyo sa mga basura nga ipataka og labay sa mga kasapaan nga maoy usa sa hinungdan nga makahugaw sa tinubdan sa tubig.

Lakip sa mitambong ang mga representante gikan sa Metro Cebu Water District (MCWD),Allan Aranquez sa DENR-7 ingon man si Konsehal Nestor Archival ug ubang sakop sa NGO's.

Ang assistant sa City Planning and Development Office sa dakbayan Maricur Encabo mitug-an nga giapil sa padayon karong gitrabaho nga master development plan sa siyudad ang pagpahigayon og rehabilitasyon sa mga nagkahugaw karon nga kasapaan.

Kini sama sa paglusad sa programang suroy-suroy sa sapa diin nagsentro kini sa rehabilitasyon sa Guadalupe river.

Pagkakaron dunay mga tinun-an gikan sa upat ka mga lainlaing inilang tunghaan dinhi sa Sugbo ang mitabang sa kampanya pagpahibalo sa publiko nga dili magpataka og labay sa ilang basura sa sapa.