Water refilling stations obligahon ipa-accredit

Gitinguha karon sa mga opisyal sa siyudad sa Sugbo nga obligahon ang pagtuman og accreditation sa mga gagmay ug dagkong water refilling station nga mamaligya og mga purified drinking water aron masiguro nga luwas kining imnon sa publiko.

Si Konsehal Arsenio Pacaña mopasar og resolusyon nga mag-awhag sa Department of Trade and Industry (DTI) sa Department of Health (DOH) pinaagi sa Bureau of Food and Drugs (BFAD) nga mohimo og pagtuon alang sa posibleng pag-obligar sa maong mga water refilling stations nga mokuha og accreditation sa dili pa tugotang makabaligya sa ilang produkto.

Kini tungod sa padayong pagkatap sa daghang mga refilling station nga namaligya og purified drinking water nga wala matino kun luwas ba imnon sa publiko ang ilang tubig.

Subay sa gihimong pagtuon sa World Health Organization (WHO) mokabat sa 3.4 milyones ka mga Pilipino ang namatay matag tuig tungod sa sakit sakit gikan sa tubig nga moresulta sa diarrhea, amoebiasis ug cholera.

Ang maong lakang nga gi-endosar sa konsehal gitumong kini aron usab madiskobrihan ang mga negosyante nga mipahimulos sa higayon nga wala magsubay sa mga hustong proseso.