30 stalls sa Freedom sirad-an sa CH

Dul-an sa 30 ka mga stalls sa Freedom Park ang pasirad-an sa siyudad sa Sugbo gumikan sa kapakyas paglukat og business permit ingon man kapakyas og bayad sa abangan niini matag bulan ngadto sa dakbayan.

Pipila ning maong mga vendors midangop ngadto kang acting market administrator Rebecca Arce sa City Hall kagahapon sa buntag aron hangyuon kini nga hatagan sila og gamay'ng higayon sa pagbayad sa maong obligasyon ug dili lang una pasirad-an.

Kini tungod kay mapupos naman karong adlawa ang lugway nga gihatag sa siyudad sa maong mga vendors nga sagad niini duna nay mga pending nga bayranan sa abangan og business permit nga moabot og P30 ngadto sa P40 mil matag usa.

Apan gipasabot ni Arce ang maong mga vendors nga mangita lang kini og gamay'ng kantidad aron bayran ang 25 porsyento sa mao nilang obligasyon ngadto sa City Treasurers Office ug ang balance niini data-datahan nalang hangtud maimpas sa bulan sa Disyembre.

Giprangkahan ni Arce ang maong mga vendors nga dili siya makapugong sa pagpatuman sa pagpasira sa ilang mga stalls kun dili kini mobayad bisan og 25 porsyento na lang sa ilang obligasyon.

Apan giklaro ni Arce nga bisan mapupos karong adlawa ang lugway nga gihatag sa maong mga vendors unya pa gyud sa Lunes nila pormal nga ipatuman ang pagpasira niadtong mga stalls nga padayong nagmagahi og bayad sa abangan ug walay business permit.