Bugtong gidemanda sa mga na-demolish nga pamilya nga mahatagan unta sila og relocation site nga maoy katarukan og balik sa mga naguba nilang pinuy-anan.
Walay nahimo ang 95 ka mga pamilya dihang gipatuman ang demolisyon sa ilang mga panimalay niadtong Agosto 9.
Gibasehan sa pamilyang Young sa pagpa-demolish sa maong mga pamilya ang court order ingon man gihatagan na usab kini og taastaas nga lugway alang sa ilang pagpangita og lugar nga kabalhinan og puyo apan wala gyud nila buhata.
Naatol nga wala si Mayor Tomas Osmeña ingon man si city administrator Francisco Bimbo Fernandez sa pag-abot sa maong mga pamilya sa City Hall kagahapon.
Si urban poor consultant Gerry Marquez mitug-an dihang nahinabi sa Banat News nga dunay uban ning maong mga pamilya ang anaa karon magtukod sa La Guerta Lahug ang luna nga gipanag-iya sa dakbayan nga gitagana alang sa relocation site.
Apan gipadalhan kini og notisya ni Marquez nga nagpahimangno nga ipaguba ang mao nilang gitukod nga mga panimalay gumikan kay wala kini moagi o wala marehistro isip mga lehitimong benepisyaryo sa Socialized Housing Program sa dakbayan.
Hinuon dunay nadawat nga impormasiyon si Marquez nga ang gipananghiran sa dili mominos 15 ka pamilya nga anaa karun magtukod sa La Guerta Lahug mao si Kapitan Mary-an delos Santos sa Lahug.
Apan giklaro ni Marquez nga walay katungod sa maong propriedad ang kapitan gumikan kay ang maong luna gipanag-iya man sa dakbayan.