Briton gitulis wad-ag P100 mil

Usa ka Briton ang nabiktima sa mga walay armas nga tulisan ug misakiyo sa kapin P100 mil nga kwarta ug bulawang alahas sa biktima niadtong Martes diha sa eskina sa V.Sotto ug Osmeña boulevard ning dakbayan.

Ang biktima nga midangop sa buhatan sa Waterfront Police station giilang si John Baptist Andre, 47, temporaryong nagpuyo sa West Gorordo Hotel sa dalan Gorordo ug lumad nga taga Britanya.

Sa imbestigasyon sa kapolisan sa Fuente nasuta nga si Andre nagpaabot og masakyang taxi diha sa nahisgutang dalan aron mohatod kaniya ngadto sa iyang gipuy-an dihang giduol og duha ka wala mailhing mga lalaki.

Matud pa sa biktima nga kalit milipot ang mga suspek diha sa iyang luyo ug gikuptan ang duha niya ka mga bukton dayong mikuha sa iyang mga alahas.

Nakuha sa mga tulisan mao ang usa ka Indian gold nga bracelet nga nagkantidad og P63 mil, Indian gold nga singsing nga nagkantidad og P19,400, cash nga P10 mil, usa ka relo de pulso nga nagkantidad og P9 mil.

Human makuha sa mga suspek ang kabtangan sa biktima dali usab silang mibiya sa lugar, ang biktima nagpatabang sa ubang mga tawo aron pagsumbong ngadto sa kapolisan sa insidente.