Ang gidakop giilang si Romulo Palomares,46, taga Kinasang-an Pardo ning dakbayan human kini makuhai og usa ka kalibre 38 rebolber nga may tulo ka buhing bala.
Sumala pa ni SPO1 Ramon Breman Budiongan sa Traffic Group nga maoy nangulo sa pagpatrolya nga ilang nasigpatan si Palomares luwan sa usa ka XRM nga may plakang 1M-1899 diha sa maong lugar.
Sa pagsusi sa mga polis sa rehistrasyon sa motor ni Palomares diha sa compartment niini sa ilawom sa lingkuranan nasigpatan ang usa ka armas nga gisulod sa usa ka itom nga holster.
Dihang gisusi nakuha ang maong armas ug walay napakitang dokumentos ang suspek sa paghupot niini nianang higayuna hinungdan sa pag-imbitar kaniya ngadto sa ilang buhatan.
Ang Traffic Group maoy usa sa mga gitahasan ni Cebu City Police Office director Melvin Gayotin sa pagpahigayon og patrolya sa dakbayan aron mamenusan ang mga insidente sa pagpanulis nga binuhatan sa mga tawong magsakay og motorsiklo.- Edwin Ian Melecio