Kabalayan duol sa mga sapa peligro

Ang mga nagpuyo sa mga daplin sa sapa, dagkong kanal ug mga lupa nga bahin sa dakbayan sa Sugbo, Talisay, Lapu-Lapu ug Mandaue naa sa peligro sa kalit nga paglunop sa tubig sa higayon nga mobundak ang kusog nga ulan.

Si Al Quidlat sa Philippine Atmospheric Geophysical and Asronomical Service Administration (Pagasa) nga gikahinabi sa Banat News nagkanayon nga ang kusog nga pagbunok sa ulan sa sagad mahitabo karong mga bulan sa Agosto hangtod sa Disyembre sa matag tuig.

Ang pagbunok sa ulan sa miaging gabii ang nimugna og grabeng pagbaha sa pipila ka dapit sa dakbayan sa Sugbo, Mandaue Lapu-Lapu ug Talisay.

Ang pagbundak sa kusog nga ulan nagsugod kini alas 7 sa gabii ug hangtod na sa kaadlawon nga maoy nakaingon sa pag-awas sa tubig sa kanal ug mga sapa.

Si Mayor Thadeo Ouano nga gikahinabi sa Banat News miingon nga ang nahitabo sa miaging gabii ang nakaaghat kaniya sa pagmando sa buhatan sa city engineer sa paghimog pakisusi sa tanang peligrosong lugar.

Dugang pa niya nga iyang gigahin ang P4.9 milyones nga kantidad pag-repair sa mga kanal sa dakbayan.