Tag-iya sa paril, ipaimbestigar

Wala pay pamahayag ang gobyerno kn may basulon bang tawo sa kamatayon sa unom ka molupyo sa dalan Sindulan, Mabolo kinsa nalumos sa baha nga misaop sa apartment nga ilang gipuy-an niadtong Martes sa gabii.

Apan matud pa ni Engr. Cris Miranda sa Office of the Building Official OBO nga ang ilang target nga imbistigahunon karong sunod semana mao ang nagtukod sa usa ka sementadong koral ug ang mga tag-iya sa mga barong-barong nga gipanarok sa tampi sa sapa.

Miingon si Miranda nga sa inspection nga ilang gihimo niadtong Miyerkules ilang gisukod ang natumbang koral nga duol na kaayo sa baba sa sapa.

Busa milapas na kini sa building code kon balaod bahin sa pagtukod og edipisyo nga nagkinahanglang idestansya kinig tulo ka metro gikan sa baba sa sapa, "3-meter basement".

Hinuon ang balay ni Florencia Dolotina nga gipuy-an sa mga biktima layo-layo ra sa tampi sa sapa busa pasado kini sa balaod sa building code.

Apan ang hinungdan sa pagkalusno sa 25 anyos nga pader sa kilid sa balay ni Dolotina nahimo dihang gikabra sa tubig ang pondasyon niini.

Ang pagdasok usab sa mga barong-barong diha sa maong sapa sa Mabolo naghatag og dakong hulga sa kinabuhi nagpuyo niini busa maoy tumong sa OBO nga hawanan ang maong sapa.

Matud pa ni Miranda nga basi sa balaod, kadtong mitukod og balay lapas sa 3-meter ang basement, usa ka kalapasan, busa angayang ipalarot ang maong mga balay.

Apan matud pa ni Miranda nga sutaon pa nilag usab kon may permiso ba sa OBO ang nalusnong pader nga didto mosandig sa pultahan sa basement nga gipuy-an sa mga biktima, nga sila si Priscilla Balagapo, anak niining si Alfredo III, Frella Ann ug Fritzie Joyce, iyaan nila nga si Abigail Familara ug ang katabang nga si Elsa Gocela.