Kapitolyo lakip sa gisudla'g baha

Nunot sa pagbunok sa kusog kaayo nga uwan niadtong Martes sa gabii, lakip sa gisudlan sa baha mao ang mga buhatan sa ubos nga bahin sa Kapitolyo sa lalawigan sa Sugbo.

Nasuta nga sa mga karaan nga istilo nga bintana nisubay ang salibo sa kusog nga uwan nga niresulta sa pagbaha sa sulod nga bahin sa nagkalainlaing buhatan.

Gipasusi ni Gobernador Gwendolyn Garcia kon unsa ang mga danyos sa mga apektadong buhatan.

Matud pa ni Garcia nga dili normal ang nasinating pagbunok sa uwan sanglit siya mismo ang nakasaksi sa kakusog niini samtang gikan sila sa lungsod sa Bogo ug gabii na nga nahiabot sa dakbayan sa Sugbo samtang walay undang ang pagbunok sa uwan.

Gipasabot ni Garcia nga dili mahimong ilisan ang mga bintana sa Kapitolyo sanglit mawagtang ang ka karaan niini.

Hinuon dunay bahin nga ayuhon aron dili na makasulod ang salibo sa uwan apan kinahanglan nga magpabilin ang orihinal nga dagway sa karaang Kapitolyo.

Hangtud kagahapon sa udto, wala pa'y nadawat nga report si Garcia kon unsa ang mga danyos nga naangkon sa mga apektadong buhatan.