Bro Soc mitugyan ni Jovan sa polis

Si Mayor Socrates Fernandez nangunay sa pagtugyan kagahapon sa hapon sa iyang anak ngadto sa hepe sa kapolisan sa Talisay human kini gipasanginlang mipusil sa usa ka drayber ug kundoktor niini niadtong Martes sa kaadlawon diha sa dalan Maglasang, Cansojong, Talisay.

Si Fernandez mibutyag sa mga tigbalita nga duna siya'y nabati nga taho nga ang iyang sinagop nga si Jovan, 23, usa sa suspetsado sa nahisgutang hitabo.

Apan ang maong pasangil gihimakak ni Jovan ug miuyon kini sa awhag sa iyang amahan nga magpaubos sa paraffin test niadtong Martes sa gabii ug ang resulta niini makuha karong hapon (Huwebes).

Gitataw ni Fernandez nga mosunod siya sa balaod kun mapamatud-an nga dunay kalambigitan ang iyang anak sa maong krimen apan ang iyang pagtahan ni Jovan ngadto ni Supt. Romeo Perigo aron ma-imbestigar ug malimpiyo ang ngalan niini.

Si Jovan usa usab ka kawani sa City Hall sa dakbayan ug nadestino kini sa pagpanapak sa mga libaong sa karsada diha sa mga barangay.

Apan gisuspenso kini ni Fernandez sa trabaho sugod kagahapon hangtud nga mahuman ang imbestigasyon sa nahisgutang hitabo.

Si Perigo sa iyang bahin mitataw nga padayon pa ang imbestigasyon sa hitabo ug wala pa usab moluwat og affidavit ang mga saksi niini kinsa gikuhaan pa nila og mga pamahayag.

Matud pa sa hepe sa kapolisan sa dakbayan nga ipasaka dayon nila sa korte ang kaso batok ni Jovan kun makumpleto na nila og kuha ang tanang mga ebidensiya.

Si Paulino Barinque, 49, ug ang kondoktor niining si Timoteo Luyan Dico, 34, maoy biktima sa pagpamusil. Si Barinque namatay samtang si Dico kritikal ang kahimtang.

Ang mga suspetsado kinsa sakay sa usa ka Toyota Revo nga kolor gray mipasutoy sa sakyanan ug pag-abot sa Dumlog namusil na usab ang mga suspetsado kinsa si Edmund Ong, 18 ug Carlos dela Calzada ang biktima sa maong pagpamusil.

Si Ong nakaangkon og samad pinusilan sa iyang tangkugo ug si dela Calzada sa iyang tiyan ug tuo nga paa.