Pamilya patay sa baha

Upat ka sakop sa pamilya, paryente ug katabang nangamatay human mangalumos ug nakuryentehan atol sa pagbaha tungod sa makusog nga ulan didto sa mga dalan Sindulan ug Gochan, Mabolo, ning dakbayan sa Sugbo kagahapon sa kaadlawon.

Ang biktima mao si Precilla Balagapo, 30, tulo ka anak niining si Alfredo III, 3 anyos, Precy Joyce, Frela Ann, 7, ug pag-umangkon sa iyang bana nga si Abegail Famillara, 24, ug katabang nga si Elsa Gocela.

Sa pasiunang imbestigasyon ni SPO2 Rey Cuyos sa Homicide Section, nasuta nga kusog kaayo ang pagbunok sa ulan kagahapon sa kaadlawon sa tibuok Sugbo nga mimugna og dakong baha sa maong dapit.

Gumikan sa kadako sa tubig, ang koral sa panimalay'ng gipanag-iya sa mga Belarmia nga tupad sa creek kalit nga nahunlak ug sa dihang wala nay kalutsan sa tubig, ang koral sa luyo nga bahin sa maong panimalay nabungkag usab ug didto mihapak sa underground sa panimalay ni Vicente Galarce diin didto nag-abang ang pamilyang Balagapo.

Gumikan sa kahinanok sa pagkatulog sa mga biktima, ang tubig dali kaayo nga nakasulod sa lawak niini ug hangtod nga miabot ang level sa tubig ngadto sa plangka ka kuryente hinungdan sa pagkakuryente usab sa mga biktima.

Matud pa ni SPO2 Cuyos nga posibleng wala na makagawas ang mga biktima sa kalit kaayo nga pagsulod sa tubig.

Naugkat ang mga biktima mga alas 6 na kagahapon sa buntag. Nagtuo ang mga silingan niini nga nangamatay sila niana pang pagka-sayong kaadlawon.

Lakip sa mitabang sa pag-ugkat sa mga biktima mao ang mga sakop sa Cebu City Disaster Coordinating Council (CCDCC) ug ang mga residente sa maong dapit.

Gisuwayan sa pagluwas ang mga biktima sa Cebu City Medical Center apan gideklarar kini nga dead on arrival.

Sa maong tambalanan gipahigayon dayon ang usa ka Santos nga Misa alang sa kalag sa mga nangamatay atol sa maong trahedya.

Nasuta usab sa mga sakop sa Homicide Section nga gamay ra kaayo ang nahisgutang sapa nga duol lamang sa koral sa pamilyang Belarmia nga maoy hinungdan sa dakong baha sa nahisgutang dapit.

Si Bise Mayor Michael Rama miawhag kang Konsehal Gerardo Carillo sa pag-abag sa mga biktima alang sa posibleng ikahatag nga hinabang gikan sa kagamhanan sa dakbayan.

Si Kapitan Sonny Borces sa Mabolo mibasol sa padayong katukoran sa dakong establisamento sa iyang barangay nga duol sa lugar nga nahitaboan nga maoy hinungdan sa trahedya.