Imnanan pirmeng samok pabutangan lang og polis

Walay laing mahimo ang Cebu City Police Office kundili ang pagbutang ra og mga polis diha sa mga imnanang dunay kanunay'ng mga samok nga nanghitabo.

Kini maoy pamahayag ni CCPO chief, Melvin Gayotin kabahin sa sitwasyon karon diha sa Mango Square sa dalan Mango Avenue diha sa barangay Camputhaw ning dakbayan.

Ang Cebu City Anti-Indecency Board (CAIB) chairman nga si Dr. Rene Josef Bullecer nagkanayon nakadawat na siya og daghang reklamo kabahin sa mga malaw-ay nga binuhatan diha sa maong dapit gikan sa mga ginikanan, tunghaan diha sa duol ug sa ubang mga tinun-an.

Matud pa sa reklamo nga gawas sa mga malaw-ay nga mga sayaw sa mga hapit nga maghubong mga babaye, duna pay magkawat-kawat og sex diha sa mga ngitngit nga dapit.

Gibutyag usab nga dunay mga menor de edad nga baligyaan og ilimnong makahubog nga usa usab ka kalapasan.

Matud pang Gayotin nga ang mahimo nila ana mao ang pagbutang og mga patrolcars ug mga sakop sa Traffic Group sanglit dili nila basta lang sitahon ang mga kustomer ug pangayuan og identification aron matino kung menor ba kini o dili.

Gibasol karon ni Gayotin ang ubang mga balaod nga maoy naggapos sa mga kamot sa mga polis aron mapatuman og husto ang balaod.

Si Mayor Tomas Osmeña mibutyag nga dunay kalapasan ang 37 ka mga stalls sa maong dapit sa lagda sa Office of the Building Office (OBO), walay mga fire exit ug uban pang kalapasan.

Ang maong dapit mao nay sagad panghitaboan og karambola sa mga batan-on makadaghang higayon nga miresulta sa pagpanunggab ug uban pa.-Edwin Ian Melecio